Erin Go Bragh

Ma name's Duncan Campbell fae the shire o’ Argyll
I've traivelled this country for mony's a mile
I've traivelled through Ireland, Scotland an aa
An the name I go under is Erin-go-Bragh

Ae night in Auld Reekie as I walked doun the street
A saucy big polis I chanced fur tae meet
He glowert in ma face an he gied me some jaw
Sayin’ when cam ye over, Erin-go-Bragh?

Well, I am not a Pat, though Ireland I've seen
Nor am I a Paddy though Ireland I’ve been
But were I a Paddy, that's naethin at aa
For thair's mony's a bauld hero in Erin-go-Bragh

Well I ken ye're a Pat by the cut o’ yer hair
Bit ye aa turn tae Scotsmen as sune as ye're here
Ye’ve left yer ain countrie for brakin the law
An we're seizin aa stragglers fae Erin-go-Bragh

An were I a Pat an ye knew it wis true
Or wis ah the devil, then whit's it tae you?
Were it no for the stick that ye haud in yer paw
I’d show ye a game played in Erin-go-Bragh

An a lump o blackthorn that a held in ma fist
Around his big body I made it tae twist
An the blood fae his napper I quickly did draw
An paid him stock-an-interest for Erin-go-Bragh

Bit the people cam roun like a flock o’ wild geese
Sayin catch that daft rascal, he's killt the police
An for every freend I had I'm shair he had twa
It wis terrible hard times for Erin-go-Bragh

Bit I cam tae a wee boat that sails in the Forth
An I packed up ma bags an I sailed for the North
Fareweill tae Auld Reekie, yer polis an aa
An the devil gang wi ye, Erin-go-Bragh

Sae come aa ye young people, whairever ye're from
I don't give a damn tae whit place ye belong
I come fae Argyll in the Heilans sae braw
An I ne'er took it ill bein caad Erin-go-Bragh