Canario Ha'eñomi

Canario ha'eñomi pe jaíre reñe'êva
Ko'ê guive revevéva reheka ne irûrãmi
Chéko ndéichante avei ñembyasýpe anga aikovéva
Che kambami ahayhuetéva ogo guive chehegui

Ahendúva reñe'êrõ, che ñe'ã rembohorýva
Che akãme ave ijatýva vy'ami ymave guare
Ko'ãga ndaje ha'e oiko ambuéndi torýpe
Ha chékatu jepoyhúpe oñatimói che rekove

Canario tyre'ỹmi ku asaje aku tiníme
Rejúva che tapỹimíme reveve rejeroky
Chéngo upéicharõ ambyasy, ajase pe reimehápe
Ta'e ndéve nde apysápe aikomaha tyre'ỹ

Pévare ãga ahakuévo aheja mbarakasãre
Iko'êva che ñe'ãre purahéi ndéve guarã
Ha maymáva toikuaa reikovaha ñembyasýpe
Reveve ko arapýpe, canario ha'eñomi